សិស្សានុសិស្សថ្នាក់ជំនាញថ្ងៃសៅរ៍ និងកីឡា នៃសាលារៀន អន្តរទ្វីប អាមេរិកាំង(AIS)គ្រប់សាខារាជធានីភ្នំពេញ គ្រប់កម្រិតពីថ្នាក់ក្រោមមត្តេយ្យ មត្តេយ្យទី១ រហូតដល់ទី១២ បានចូលរួមកម្មវិធីប្រឡងពាក់កណ្តាលឆមាសលើកទី១ កាលពីថ្ងៃទី6 ខែធ្នូ ឆ្នាំ2025 កន្លងមកនេះ។

លោក សែម ពេជ្រ នាយកកីឡា នៃមជ្ឈមណ្ឌលភាសា អេ អាយ អាយ និងសាលារៀន អន្តរទ្វីប  អាមេរិកាំង  បានឱ្យដឹងថា ដើម្បីចូលរួមចំណែកក្នុងការបណ្ដុះបណ្ដាលសមត្ថភាព ស្មារតី កាយសម្បទា ទេពកោសល្យ   និងបំណិនជីវិតរបស់សិស្សានុសិស្សឱ្យកាន់តែទទួលបាននូវប្រសិទ្ធភាពខ្ពស់ស្របតាមតម្រូវការ និងការវិវឌ្ឍយ៉ាងឆាប់រហ័សរបស់ប្អូនៗ 
គណៈគ្រប់គ្រងសាលាបានរៀបចំនូវកម្មវិធីសិក្សាថ្ងៃសៅរ៍ជូនដល់ប្អូនៗសិស្សានុសិស្ស។ ជំនាញថ្ងៃសៅរ៍ រួមមាន ដូចជា របាំ តន្ត្រី គេហកិច្ច គណនាលេខរហ័ស និងកីឡាប្រភេទផ្សេងៗជាច្រើនទៀត។

លោកបន្ថែមថា សម្រាប់ការប្រឡងពាក់កណ្តាលឆមាសលើកទី១នេះធ្វើឡើងក្នុងគោលបំណង ដើម្បីវិនិ ច្ឆ័យលើកម្រិតសមត្ថភាពចំណេះដឹងរបស់សិស្សដោយឈរ លើគោលការណ៍យុត្តិធម៌ តម្លាភាព និងលទ្ធផលទទួលយកបាន ដោយក្នុងមួយឆមាសយើងប្រឡងពាក់កណ្ដាលឆមាសម្ដង ដើម្បីអាចឃើញពីកម្រិតសមត្ថភាព និងបំណិនពិតប្រាកដរបស់សិស្សនៅក្នុងមុខវិជ្ជានីមួយៗ។ 

កម្មវិធីប្រឡងពាក់កណ្តាលឆមាសរបស់ AIS មិនត្រឹមតែជាការវាយតម្លៃលើលទ្ធផលសិក្សារបស់សិស្សប៉ុណ្ណោះទេ ប៉ុន្តែជាការបង្កើនការត្រៀមខ្លួនរបស់សិស្សសម្រាប់បន្តទៅថ្នាក់រៀនខាងមុខទៀត។ សាលារៀន អន្តរទ្វីប អាមេរិកាំង បន្តប្ដេជ្ញាផ្តល់បរិយាកាសសិក្សាដែលមានគុណភាព សុវត្ថិភាព និងស្តង់ដា ដើម្បីបណ្តុះបណ្តាលសិស្សឱ្យក្លាយជាអ្នកសិក្សាដែលមានសមត្ថភាព និងទំនួលខុសត្រូវក្នុងអនាគត៕