សិស្សថ្នាក់ទី៣ នៃសាលារៀនអន្តរទ្វីប អាមេរិកាំង (AIS )សាខាខេត្តតាកែវ  បានចុះកម្មសិក្សាទៅកន្លែងកម្សាន្ត Kid Village  នាថ្ងៃទី៦ ខែមករា ឆ្នាំ២០២៦ ចាងហ្វាង ជ័យ ស្រីណាក់ ដែលដឹកនាំសិស្សក្នុងកម្មសិក្សានេះ បានប្រាប់ឱ្យដឹងអំពីគោលបំណងសំខាន់នៃការចុះកម្មសិក្សាគឺដើម្បីបង្កើនភាពក្លាហាន និងបទពិសោធក្នុងការសហការ ការដឹកនាំ សាមគ្គីភាព ឯករាជ្យភាព ភាពម្ចាស់ការ ទំនាក់ទំនងក្នុងក្រុម ទំនាក់ទំនងជាមួយមហាជនបានកាន់តែប្រសើរ រួមទាំង រឹតចំណងមិត្តភាព និងសាមគ្គីភាពជាមួយមិត្តរួមថ្នាក់ និងមិត្តរួមសាលារៀនរបស់ពួកគេ ដោយបានឆ្លុះបញ្ចាំង និងផ្សារភ្ជាប់ខ្លឹមសារដែលបានសិក្សានៅក្នុងមេរៀនទៅនឹងស្ថានភាពសង្គមជាក់ស្ដែង។

សាលា AIS បានជ្រើសកន្លែង Kid Village ព្រោះតែទីតាំងនេះមានសម្ភារៈឧបករណ៍សិក្សាដ៏ទំនើបៗនៅក្នុងសួនកម្សាន្តសម្រាប់កុមារលេងសម្បូរបែប ទីតាំងធំទូលាយ បុគ្គលិកយចិត្តទុកដាក់ជាមួយកុមារ មានអនាម័យបន្ទប់ស្អាត ម្យ៉ាងវិញទៀត គឺមានទីតាំងនៅជិតសាលា។

តាមរយៈសកម្មភាពទាំងនេះ សិស្សបានអភិវឌ្ឍជំនាញ និងចំណេះដឹងផ្សេងៗ ដែលរួមមានភាពក្លាហាន និងការប្រឹក្សាផ្ទាល់ខ្លួនល្អ រៀបចំ និងរក្សាសម្ភារៈឲ្យមានរបៀប បង្កើនសាមគ្គីភាព និងការសហការជាក្រុម និងអនុវត្តបទពិសោធន៍ជីវភាពរស់នៅតាមរយៈការលេង និងសកម្មភាពផ្សេងៗ សកម្មភាពដែលធ្វើឱ្យសិស្សចាប់អារម្មណ៍ខ្លាំងបំផុត គឺការបាញ់កាំភ្លើងខ្យល់ដោយប្រើកូនបាល់ជាគ្រាប់ និងលេងបោះបាល់កម្តៅសាច់ដុំដៃ។

ចាងហ្វាង ជ័យ ស្រីណាក់  បានបញ្ជាក់ថា ការចុះកម្មសិក្សានេះជួយអភិវឌ្ឍចំណេះដឹង ឬជំនាញផ្ទាល់ខ្លួនរបស់សិស្សបានយ៉ាងល្អ ជួយឱ្យកុមារមានភាពរហ័សរហួន ក្លាហាន និងមានការទប់លំនឹងដងខ្លួនល្អ មិនតែប៉ុណ្ណោះសិស្សានុសិស្សមានភាពក្លាហានចេះជួយគ្នានៅពេលមានបញ្ហា ទទួលបាននូវចំណេះដឹងថ្មីៗ និងអារម្មណ៍ស្រស់ស្រាយក្នុងពេលកំពុងចុះកម្មសិក្សានៅទីនោះ ក៏ដូចជា ពេលត្រឡប់មកគេហដ្ឋានវិញផងដែរ៕