ក្រសួងនឹងសិក្សាពីលទ្ធភាពផ្ដល់ ប.ស.ស ជាកញ្ចប់គ្រួសារដល់អ្នកសេដ្ឋកិច្ចកិច្ចក្រៅប្រព័ន្ធ

បានផ្សាយចេញ | ២៧ វិច្ឆិកា ២០២៤

ក្រសួងនឹងសិក្សាពីលទ្ធភាពផ្ដល់ ប.ស.ស ជាកញ្ចប់គ្រួសារដល់អ្នកសេដ្ឋកិច្ចកិច្ចក្រៅប្រព័ន្ធ

អង្គការអុកស្វាម បានរៀបចំវេទិកាប្រចាំឆ្នាំថ្នាក់ជាតិ រវាងបេឡាជាតិសន្តិសុខសង្គម ជាមួយ​ថ្នាក់​ដឹកនាំសហគមន៍ និងតំណាងកម្មករនិយោជិត ក្រោមប្រធានបទ គាំពារសង្គម​សម្រាប់​ទាំង​អស់គ្នា ដើម្បីអន្តរកាលប្រកបដោយយុត្តិធម៌នៅកម្ពុជា នៅភ្នំពេញ ថ្ងៃ​ទី២៦ ខែវិច្ឆិកា ឆ្នាំ២០២៤។ មុន​ឈានដល់ការរៀបចំវេទិកាថ្នាក់ជាតិនេះ អង្គការ អុកស្វាម បានរៀបចំថ្នាក់តំបន់៣លើករួចទៅហើយ គឺ​នៅខេត្តព្រះសីហនុ ស្វាយរៀង និងសៀមរាប។ 

តាមរយៈពេលវេទិកាទាំង៤លើកនេះ ឯកឧត្តមបណ្ឌិត ហេង សុផាន់ណារិទ្ធ អគ្គនាយករងបេឡាជាតិ​សន្តិ​សុខសង្គម បាន​សង្កេតឃើញថា មានភាគីពាក់ព័ន្ធចូលរួមជាច្រើន ជាពិសេស អាជីវករ​លក់ដូរ និងកសិករ។ ឯកឧត្តមបណ្ឌិត ហេង សុផាន់ណារិទ្ធ បានឃើញពួកគេ មានការឈ្វេងយល់អំពីអត្ថប្រយោជន៍ បេឡាជាតិ​សន្តិសុខសង្គម (ប.ស.ស) យ៉ាងផុសផុល តាមរយៈការឆ្លើយឆ្លងជាមួយវាគ្មិនជំនាញ។ 

នៅលើវេទិកាប្រចាំឆ្នាំថ្នាក់ជាតិនៅថ្ងៃអង្គាម្សិលមិញនេះ ឯកឧត្តមបណ្ឌិត ហេង សុផាន់ណារិទ្ធ បានថ្លែងថា ក្នុងវេទិកាទាំង៤លើក គឺតែងតែទទួលបានការស្នើសុំឱ្យបញ្ចុះតម្លៃ​នៃការ​បង់វិភាគទាន សម្រាប់បុគ្គលស្វ័យនិយោគ នៅពេលពួកគេ មានសមាជិកគ្រួសារច្រើនរូប។  ជាមួយគ្នានេះដែរ លោកឃើញមានការទាមទារឱ្យ ប.ស.ស និងក្រសួងសុខាភិបាល ពង្រឹង​ការផ្ដល់សេវាដល់អ្នកប្រើប្រាស់ប័ណ្ណ ប.ស.ស។ ចំណុចចម្បងមួយទៀត ឯកឧត្តមបណ្ឌិត ហេង សុផាន់​ណារិទ្ធ ឃើញភាគីចូលរួមក្នុងវេទិកា​ មិនចង់ឱ្យទុកនរណាម្នាក់​ ឃ្លាតឆ្ងាញពី​ប្រព័ន្ធគាំពារ​សង្គមឡើយ។