នៅថ្ងៃទី១៩ ខែសីហា ឆ្នាំ២០២៤ នេះ សាលារៀន អន្តរទ្វីប អាមេរិកាំង បានបើកថ្នាក់រៀនត្រៀមសម្រាប់ឆ្នាំសិក្សាថ្មី២០២៤-២០២៥ និងកម្មវិធីរៀនប្រឡងឡើងថ្នាក់ នៅតាមសាខាទាំង១២ ក្នុងនោះ មានដូចជា សាខាទួលគោក ទួលសង្ខែ ចាក់អង្រែ​ ចោមចៅ ផ្សារថ្មី សែនសុខ ចំការដូង ជ្រោយចង្វារ​ ច្បារអំពៅ ម៉ៅសេទុង និងសាខាពីរកន្លែងទៀត គឺខេត្តសៀមរាប និងតាកែវ។

តាមការសង្កេតជាក់ស្តែង យើងឃើញថា សិស្សានុសិស្សទាំងឡាយ មានទឹកមុខសប្បាយរីករាយ ដោយពួកគាត់បានជួបជុំមិត្តភក្តិទាំងចាស់ ទាំងថ្មី របស់ពួកគាត់ ដែលបានបែកគ្នាអស់មួយរយៈពេលកន្លងទៅ។ ចំណែកនៅមុខបរិវេណសាលារៀន លោកគ្រូ អ្នកគ្រូ ក៏មានទឹកមុខញញឹមរុះរាយរាក់ទាក់ ដោយបានសំពះស្វាគមន៍សិស្សានុសិស្ស និងអ្នកអាណាព្យាបាលសិស្សជាច្រើន ដែលនាំបុត្រធីតាមកសិក្សានៅសាលារៀន អន្តរទ្វីប     អាមេរិកាំង។

គួររំលឹកជូនថា​ ការបើកថ្នាក់រៀនត្រៀមសម្រាប់ឆ្នាំសិក្សាថ្មី២០២៤-២០២៥ និងកម្មវិធីរៀនប្រឡងឡើងថ្នាក់នេះ គឺធ្វើឡើងដើម្បីឱ្យសិស្សានុសិស្ស បំប៉នចំណេះដឹងថ្នាក់មូលដ្ឋានរបស់គាត់ ឱ្យកាន់តែខ្លាំងក្លាឡើង។ មួយវិញទៀត ក៏ដើម្បីរំលឹកមេរៀនឆ្នាំចាស់ សម្រាប់ការសិក្សាឆ្នាំថ្មីផងដែរ។ ហើយបន្ថែមពីលើនេះ​ គឺដើម្បីឱ្យសិស្សានុសិស្ស មានឱកាសបានជួបជុំមិត្តភក្តិ  និងស្គាល់មិត្តភក្តិទៅវិញទៅមក ជាហេតុញ៉ាំងឱ្យបរិយាកាសសិក្សាកាន់តែស្និទ្ធស្នាល និងមានអារម្មណ៍សប្បាយរីករាយ។

ក្នុងការចូលរៀនត្រៀមនោះ មានលក្ខខណ្ឌងាយៗ គឺសិស្សានុសិស្ស អាចចូលរៀនត្រៀមសម្រាប់ឆ្នាំសិក្សាថ្មីដោយឥតគិតថ្លៃ រួមទាំងមានអត្ថប្រយោជន៍ជាច្រើនផ្សេងទៀត ដោយគ្រាន់តែលោកអ្នកចុះឈ្មោះ(សិស្សថ្មី) ឬបង់ថ្លៃសិក្សាឱ្យកូនៗ (សិស្សចាស់)​ ចាប់ពីថ្ងៃជូនដំណឹងនេះ រហូតដល់ថ្ងៃទី០៧ ខែកញ្ញា ឆ្នាំ២០២៤។

ជាការពិតណាស់ សាលារៀន អន្តរទ្វីប អាមេរិកាំង គឺជាសាលារៀនឈានមុខគេមួយ ដែលទទួលសិស្សានុសិស្ស ចាប់ពីថ្នាក់ក្រោមមតេ្តយ្យសិក្សា រហូតដល់ទី១២ តាមបែបខ្មែរ-អាមេរិកាំង ដំបូងគេបង្អស់ នៅក្នុងព្រះរាជាណាចក្រកម្ពុជា។ អ្វីដែលកាន់តែពិសេស AIS ត្រូវបានទទួលស្គាល់ដោយក្រសួងអប់រំ យុវជន និងកីឡា តាមប្រកាសលេខ១៩១០ អយក. ប្រក. ចុះថ្ងៃទី២៧ ខែវិច្ឆិកា ឆ្នាំ២០០៦ និងលេខ៤៥៨ អយក. ប្រក. ចុះថ្ងៃទី២៧ ខែមីនា ឆ្នាំ២០០៧។

សូមជម្រាបជូនថា សាលារៀន អន្តរទ្វីប​ អាមេរិកាំង មានការបន្ថែមជូននូវកម្មវិធីសិក្សាពិសេសៗ រួមមានមុខវិជ្ជា បំណិនជីវិត និងមុខវិជ្ជាជំនាញជម្រើសដ៏សម្បូរបែបដូចជា គំនូរ របាំ តន្រី្ត កំណាព្យ គេហវិទ្យា ហត្ថកម្ម​ អប់រំកាយ និងកីឡា ដូចជា ការ៉ាតេ បាល់បោះ បាល់ទះ បាប៊ី វាយកូនឃ្លីលើតុ វាយកូនបាល់ ហែលទឹក និងកីឡា  ផ្សេងៗទៀត។ មិនត្រឹមតែប៉ុណ្ណោះ សាលារៀនដ៏មានប្រជាប្រិយភាពមួយនេះ ក៏មានបន្ថែមនូវមុខវិជ្ជាកុំព្យូទ័រ ភ្ជាប់ដោយប្រព័ន្ធអ៊ីនធឺណែត បណ្តាល័យស្រាវជ្រាវពោរពេញដោយឯកសារគ្រប់កម្រិត និងគ្រប់ជំនាញផងដែរ។

ដូច្នេះ ឱកាសនៃការបើកថ្នាក់រៀនត្រៀមសម្រាប់ឆ្នាំសិក្សាថ្មី២០២៤-២០២៥ និងកម្មវិធីរៀនប្រឡងឡើងថ្នាក់នាឆ្នាំនេះ គឺនឹងធ្វើឱ្យសិស្សានុសិស្សដែលបានសិក្សានៅ AIS មានទំនុកចិត្តខ្ពស់ លើការសិក្សារបស់ខ្លួន និងមានក្តីសង្ឃឹមច្រើន ក្នុងការប្រឡងជាប់ដោយការជឿជាក់៕