លោកឧត្តមសេនីយ៍ទោ ជួន ណារិន្ទ ស្នងការនគរបាលរាជធានីភ្នំពេញ បានមានប្រសាសន៍កាលពីម្សិលមិញថា នគរបាល នឹងដាក់ពង្រាយសន្តិសុខជាង ២០០០នាក់ ដើម្បីការពារប្រជាពលរដ្ឋ ក្នុងឱកាសពិសេសបុណ្យភ្ជុំបិណ្ឌ និងបុណ្យកឋិនទាន ដែលនឹងប្រព្រឹត្តទៅនាពេលប៉ុន្មានថ្ងៃខាងមុខនេះ។
លោក​បានបន្តទៀតថា ប៉ូលិស​នឹង​ដាក់​ពង្រាយ​តាម​វត្ត​សំខាន់ៗ​ចំនួន ១៥០ ក្នុង​ក្រុង ដោយ​មានសហការ​ជាមួយ​កម្លាំង​សន្តិសុខ​ក្នុង​មូលដ្ឋាន ដើម្បី​រក្សា​សន្តិសុខ និង​ទប់ស្កាត់​បទល្មើស ដែលអាចនឹងកើតមានឡើងផ្សេងៗ។  មន្ត្រី​គ្រប់គ្រង​ចរាចរណ៍​ចំនួន ៤៦ នាក់​ទៀត​នឹង​ត្រូវ​បំពេញ​កាតព្វកិច្ច ក្នុងឱកាសពិធីបុណ្យជាតិដ៏ពិសេសនេះ។
លោក ឃួង ស្រេង អភិបាលរាជធានីភ្នំពេញ បានណែនាំដល់អភិបាលខណ្ឌទាំង១៤ និងកម្លាំងសន្តិសុខ ឱ្យរក្សាសុវត្ថិភាព សណ្តាប់ធ្នាប់ជូនប្រជាពលរដ្ឋ ដែលធ្វើដំណើរក្នុងពិធីបុណ្យ និងជួយឧបត្ថម្ភប្រជាពលរដ្ឋ ដែលមកចូលរួមបុណ្យកឋិនទាន តាមវត្តនានាក្នុងរាជធានីភ្នំពេញ។

លោកក៏បានស្នើដល់អាជ្ញាធរខណ្ឌ ត្រូវរៀបចំការចុះល្បាតជាប្រចាំនៅតាមលំនៅដ្ឋាន ដើម្បីឃ្លាំមើលទ្រព្យសម្បត្តិឯកជនរបស់ប្រជាពលរដ្ឋ ពេលពួកគេទៅលេងសាច់ញាតិជិតឆ្ងាយរបស់ពួកគេ នៅតាមបណ្តាខេត្ត     ផ្សេងៗ។