នាព្រឹកថ្ងៃទី១៦ ខែកញ្ញា ឆ្នាំ២០២៤ មជ្ឈមណ្ឌលភាសា អេ អាយ អាយ (Aii) និងសាលារៀន អន្ដរទ្វីប អាមេរិកាំង (AIS) មានមោទកភាព ក្នុងការបើកសម្ពោធសាខាថ្មី ដោយមានទីតាំងនៅចំការដូង ដើម្បី បន្តបេសកកម្មរបស់ខ្លួន ក្នុងការផ្តល់ជូននូវការអប់រំប្រកបដោយគុណភាព លើជំនាញភាសា និងថ្នាក់ចំណេះ ទូទៅខ្មែរ ជូនដល់សិស្សានុសិស្សទូទាំងប្រទេសកម្ពុជា។ 

សាខាចំការដូងថ្មីនេះ គឺជាសាខាទី ២១ និង ២២ ដែលស្ថិតនៅក្នុងគម្រោងពង្រីកវិសាលភាពរបស់Aii និង AIS ហើយត្រូវបានដាក់សម្ពោធដើម្បីឆ្លើយតបទៅនឹងតម្រូវការអប់រំដែលកំពុងកើនឡើងនៅក្នុងតំបន់ពីសំណាក់ សិស្សានុសិស្ស និងអ្នកអាណាព្យាលបាល នៅក្នុងតំបន់នេះ។ Aii នឹងទទួលស្វាគមន៍សិស្សានុសិស្សមកកាន់ សាខាចំការដូងសម្រាប់វគ្គសិក្សាថ្មីទី ៨៥ នៅថ្ងៃទី២៥ ខែកញ្ញា ឆ្នាំ២០២៤ ហើយ AIS នឹងទទួលសិស្សានុសិស្សសម្រាប់បវេសនកាលឆ្នាំសិក្សាថ្មី២០២៤-២០២៥ នៅថ្ងៃទី០៧ ខែតុលា ឆ្នាំ២០២៤។

ស្ថិតនៅក្នុងតំបន់ដែលកំពុងមានកំណើនសក្តានុពលនៃរាជធានីភ្នំពេញ សាខាចំការដូង ហ៊ុមព័ទ្ធទៅដោយផ្សារ ធនាគារ ភោជនីយដ្ឋាន មន្ទីរពេទ្យ និងកន្លែងកម្សាន្តជាច្រើន ហើយអាចធ្វើដំណើរទៅមកបានយ៉ាង ងាយស្រួល។ ការរចនាស្ថាបត្យកម្មអគារសិក្សាសម្រាប់សាខាថ្មីនេះ មានរាងជាអក្សរ U ដែលតំណាងឱ្យការប្តេជ្ញាចិត្តរបស់ Aii និង AIS ក្នុងការផ្តល់ការអប់រំប្រកបដោយគុណភាពដល់សិស្សានុសិស្សនៅក្នុងសហគមន៍និងអ្នកសិក្សានៅសតវត្សរ៍ទី២១នេះ។

ពិធីនេះ បានប្រព្រឹត្តទៅយ៉ាងអធិកអធម ដោយមានវត្តមានអ្នកឧកញ៉ា វេជ្ជបណ្ឌិត គួច ម៉េងលី ដែលជាស្ថាបនិក ប្រធានក្រុមប្រឹក្សាភិបាល និងអគ្គនាយកប្រតិបត្តិ ក្រុមហ៊ុន ម៉េងលី ជេ. គួច អេឌ្យូខេសិន (MJQE) ក្រុមប្រឹក្សាភិបាល លោក ឡាយ សុភា ប្រធាន នៃមជ្ឈមណ្ឌលភាសា អេ អាយ អាយ (Aii) លោកស្រី រស់ យ៉ាណា ប្រធាន នៃសាលារៀន អន្ដរទ្វីប អាមេរិកាំង (AIS) មានការចូលរួមដោយគណៈកម្មការ កម្មវិធីសិក្សារបស់ Aii និង AIS រួមទាំងថ្នាក់ដឹកនាំនៃ MJQE ជាច្រើនរូបផ្សេងទៀតផងដែរ។

អ្នកឧកញ៉ា វេជ្ជបណ្ឌិត គួច ម៉េងលី ដែលជាស្ថាបនិក ប្រធានក្រុមប្រឹក្សាភិបាល និងអគ្គនាយកប្រតិបត្តិ នៃក្រុមហ៊ុន ម៉េងលី ជេ. គួច អេឌ្យូខេសិន បានមានប្រសាសន៍ថា៖ «ការសម្ពោធសាខាចំការដូងនេះ គឺជាការបោះជំហានឆ្ពោះទៅមុខយ៉ាងសំខាន់មួយទៀតរបស់យើង ក្នុងបេសកកម្មផ្តល់ការអប់រំដែលមាន គុណភាពពិតប្រាកដ ដើម្បីអប់រំសិស្សានុសិស្សទូទាំងប្រទេសកម្ពុជា ដើម្បីឱ្យពួកគាត់អាចមានសមត្ថភាព ក្នុងការចាប់យកឱកាសនានានៅទូទាំងពិភពលោក»។

Aii សាខាចំការដូង ផ្តល់ជូននូវកម្មវិធីភាសាដ៏ទូលំទូលាយ រួមទាំងភាសាអង់គ្លេស និងភាសាចិន ចាប់ពីកម្រិត មត្តេយ្យសិក្សា រហូតដល់កម្រិតឌីប្លូម។ Aii ធានាថា សិស្សានុសិស្សនៅគ្រប់ដំណាក់កាល នៃដំណើរការសិក្សារបស់ពួកគេ អាចទទួលបានការណែនាំប្រកបដោយគុណភាពខ្ពស់បំផុត និងត្រួសត្រាយផ្លូវរបស់ពួកគេ សម្រាប់ភាពជោគជ័យនៅក្នុងសកលភាវូបនីយកម្ម។

គុណភាពអប់រំនៅតែជាតម្លៃស្នូល

ការប្តេជ្ញាចិត្តក្នុងការផ្តល់គុណភាពអប់រំរបស់មជ្ឈមណ្ឌលភាសា អេ អាយ អាយ (Aii) និងសាលារៀន អន្ដរទ្វីប អាមេរិកាំង (AIS) និងក្រុមហ៊ុន ម៉េងលី ជេ. គួច អេឌ្យូខេសិន (MJQE) គឺលើសពីការអប់រំនៅថ្នាក់រៀន។ ហើយនាពេលថ្មីៗនេះ សន្និសីទនៃការបង្រៀនថ្នាក់ជាតិលើកដំបូងរបស់ប្រទេសកម្ពុជា ត្រូវបានរៀបចំឡើង ដើម្បី ជម្រុញការពិភាក្សា និងការអប់រំតាមបែបបច្ចេកវិទ្យា និងឌីជីថលនៅទូទាំងប្រទេសកម្ពុជា។  

មួយវិញទៀត «ព្រឹត្តិការណ៍រត់ដើម្បីសប្បុរសធម៌លក្ខណៈគ្រួសារ (Family Fun Run)» បានដឹកនាំ សិស្សានុសិស្ស ក្រុមគ្រួសារ និងសហគមន៍នៅក្នុងតំបន់ចំការដូង មកជួបជុំគ្នា ដើម្បីលើកកម្ពស់សុខភាព និងការ រៃអង្គាសថវិកាសម្រាប់សកម្មភាពសប្បុរសនៅក្នុងតំបន់នេះ។ ជាការពិតណាស់ ព្រឹត្តិការណ៍ទាំងនេះ បង្ហាញពី ការប្តេជ្ញាចិត្តរបស់ Aii, AIS និង MJQE ក្នុងការចូលរួមសហគមន៍ ដោយការឆ្លុះបញ្ចាំងពីបេសកកម្មរបស់ខ្លួនក្នុង ការចូលរួមចំណែកជាវិជ្ជមានដល់សង្គមកម្ពុជា។

Aii និង AIS គឺជាគ្រឹះស្ថានអប់រំឈានមុខគេមួយនៅប្រទេសកម្ពុជា ដែលផ្តល់ជូននូវកម្មវិធី និងវគ្គសិក្សាយ៉ាងសម្បូរបែប លើជំនាញភាសាអង់គ្លេស ចិន ថៃ និងថ្នាក់ចំណេះទូទៅខ្មែរ។  ហើយដោយមានការប្តេជ្ញាចិត្តយ៉ាងមុតមាំ ទើប Aii និង AIS ទទួលបានកេរ្តិ៍ឈ្មោះ និងទំនុកចិត្តខ្ពស់ពីមាតាបិតា និងអ្នកអាណាព្យាបាលសិស្សរាប់ម៉ឺននាក់ ព្រមទាំងមានការអប់រំប្រកបដោយគុណភាព និងបង្ហាត់បង្រៀនសិស្សានុសិស្សជាច្រើនរូប ឱ្យទទួលបានភាពជោគជ័យ ទាំងនៅក្នុងសាលារៀន និងទាំងនៅលើជីវិតផ្ទាល់ខ្លួនរបស់ពួកគាត់។

សម្រាប់ព័ត៌មានបន្ថែមអំពី Aii និង AIS សូមទាក់ទងតាមរយៈទូរសព្ទលេខ 077 212 610 ឬទាក់ទងតាមរយៈអ៊ីមែល info@aii.edu.kh ឬ info@ais.edu.kh។

ឬទំនាក់ទំនងមកកាន់
លោក ស៊ូ ពិសែន
ប្រធានផ្នែកផ្សព្វផ្សាយ និងទីផ្សារ
មជ្ឈមណ្ឌលភាសា អេ អាយ អាយ (Aii)
+855 12 920 028
pisen.sou@aii.edu.kh