អត្ថបទព័ត៌មានស្តីពីអាជីព និងការងារ
ក្រោមប្រធានបទ “ការធ្វើអាជីវកម្មសម័យថ្មី យុគសម័យឌីជីថល”
អត្ថបទដកស្រង់ដោយ : តាប់ សោភ័ណ្ឌ
#MJQE #AmericanInterconSchool

នៅក្នុងរបត់សេដ្ឋកិច្ចសកលលោក និងការវិវត្តយ៉ាងរហ័សនៃបច្ចេកវិទ្យា និយមន័យនៃការធ្វើអាជីវកម្ម (Business) បានផ្លាស់ប្តូរទម្រង់យ៉ាងខ្លាំង។ ការធ្វើអាជីវកម្មក្នុងសម័យបច្ចុប្បន្ន លែងជាសកម្មភាពទិញ-លក់ធម្មតា ដើម្បីតែផលចំណេញក្នុងរយៈពេលខ្លីទៀតហើយ ប៉ុន្តែវាគឺជាសិល្បៈនៃការបង្កើតតម្លៃ ការដោះស្រាយបញ្ហាសង្គម និងការកសាងប្រព័ន្ធគ្រប់គ្រងមួយដែលមានភាពបត់បែន។ ដើម្បីធានាបាននូវ ភាពរីកចម្រើនប្រកបដោយនិរន្តរភាព សហគ្រិនសម័យថ្មីចាំបាច់ត្រូវក្តោបក្តាប់នូវយុទ្ធសាស្ត្រស្នូលចំនួន ៣យ៉ាង។

១. ការដោះស្រាយបញ្ហារបស់អតិថិជន (Customer Pain Points) :
អាជីវកម្មដែលបង្កើតឡើងរយៈពេលវែង មិនមែនចាប់ផ្តើមពីការចង់លក់ផលិតផលដែលខ្លួនមាននោះទេ ប៉ុន្តែចាប់ផ្តើមពីការស្វែងយល់ថាតើទីផ្សារ ឬអតិថិជនកំពុងជួបប្រទះនូវបញ្ហាអ្វី។ នៅក្នុងទ្រឹស្តីទីផ្សារសម័យថ្មី ផលិតផល ឬសេវាកម្មមួយ គឺជាលក់ « ដោះស្រាយ» (Solution)។
ឧទាហរណ៍៖ ការលេចរូបរាងឡើងនៃកម្មវិធីហៅយានជំនិះតាមបច្ចេកវិទ្យា (Ride-hailing Apps) ដូចជា Grab ឬ Pass App នៅក្នុងប្រទេសកម្ពុជាជាដើម។ ក្រុមហ៊ុនទាំងនេះបានមើលឃើញពីតម្រូវការរបស់អ្នកដំណើរទាក់ទងនឹងការលំបាកក្នុងការរកយានជំនិះនៅពេលយប់ ភាពមិនច្បាស់លាស់នៃតម្លៃ និងសុវត្ថិភាពក្នុងការធ្វើដំណើរ។ ការបង្កើតកម្មវិធីនេះឡើងមិនត្រឹមតែបង្កើតអាជីវកម្មខ្នាតយក្សមួយប៉ុណ្ណោះទេ ប៉ុន្តែវាបានកែប្រែទម្លាប់នៃការធ្វើដំណើររបស់មនុស្សក្នុងសង្គម។
 
២. បរិវត្តកម្មឌីជីថល (Digital Transformation) :
បច្ចុប្បន្ននេះ បច្ចេកវិទ្យាបានក្លាយជាឆ្អឹងខ្នងនៃអាជីវកម្មគ្រប់កម្រិត។ សហគ្រាសធុនតូច និងមធ្យម (SMEs) រហូតដល់ក្រុមហ៊ុនសាជីវកម្មធំៗ មិនអាចមើលរំលងការធ្វើបរិវត្តកម្មឌីជីថលបានឡើយ។ ការប្រែប្រួលទម្លាប់ជាសកលនៃការទិញទំនិញ និងការទូទាត់ប្រាក់ បានបង្ខំឱ្យអាជីវកម្មនានាត្រូវតែមានវត្តមាននៅលើប្រព័ន្ធអ៊ីនធឺណិត។
ឧទាហរណ៍៖ ហាងលក់ទំនិញលក់រាយ ឬហាងកាហ្វេជាច្រើននាពេលបច្ចុប្បន្ន បានពង្រីកទីផ្សាររបស់ខ្លួនពីហាងផ្ទាល់ដី (Brick-and-Mortar) ទៅកាន់ការលក់តាមប្រព័ន្ធអនឡាញ ការផ្សាយផ្ទាល់ (Live Stream) និងការប្រើប្រាស់ប្រព័ន្ធទូទាត់ប្រាក់អេឡិចត្រូនិកដូចជា KHQR។ ការផ្លាស់ប្តូរនេះ ជួយឱ្យអាជីវកម្មកាត់បន្ថយថ្លៃដើមលើការជួលទីតាំងធំៗ ប៉ុន្តែអាចពង្រីកវិសាលភាពនៃការលក់ទៅកាន់អតិថិជននៅទូទាំងប្រទេសដោយគ្មានដែនកំណត់។
 
៣. ការគ្រប់គ្រងលំហូរសាច់ប្រាក់ និងធនធានមនុស្ស :
ការមានគំនិតច្នៃប្រឌិត និងការលក់ដាច់ គឺមិនទាន់គ្រប់គ្រាន់ឡើយ ប្រសិនបើកង្វះខាតការគ្រប់គ្រងផ្ទៃក្នុង ជាពិសេសគឺ «លំហូរសាច់ប្រាក់» (Cash Flow) និង «ធនធានមនុស្ស»។ ក្រុមហ៊ុនជាច្រើនត្រូវប្រឈមមុខនឹងការក្ស័យធន មិនមែនដោយសារគ្មានអតិថិជននោះទេ ប៉ុន្តែដោយសារតែវិបត្តិអសមតុល្យហិរញ្ញវត្ថុ។ នៅក្នុងអាជីវកម្មខ្នាតតូច ម្ចាស់អាជីវកម្មភាគច្រើនជួបហានិភ័យដោយសារតែការយកថវិកាផ្ទាល់ខ្លួន និងថវិការកស៊ីមកឡូកឡំគ្នា ដែលធ្វើឱ្យការគណនាថ្លៃដើម និងប្រាក់ចំណេញសុទ្ធមានភាពមិនច្បាស់លាស់។ ផ្ទុយទៅវិញ អាជីវកម្មដែលមានការរៀបចំរចនាសម្ព័ន្ធត្រឹមត្រូវ តែងតែមានប្រព័ន្ធគណនេយ្យច្បាស់លាស់ និងមានកញ្ចប់ថវិកាបម្រុងសម្រាប់គ្រាអាសន្ន។ ទន្ទឹមនឹងនោះ ការវិនិ យោគលើការបណ្តុះបណ្តាលបុគ្គលិក និងការបង្កើតបរិយាកាសការងារល្អ គឺជាគន្លឹះរក្សាធនធានមនុស្សដែលជាកម្លាំងចលកររុញច្រានក្រុមហ៊ុន។
 
សរុបជារួមមក ការធ្វើអាជីវកម្មក្នុងយុគសម័យនេះ មិនមែនជាការរត់ប្រណាំងចម្ងាយខ្លី (Sprint) ដែលផ្តោតលើផលចំណេញភ្លាមៗនោះទេ ប៉ុន្តែវាគឺជាការទាមទារនូវភាពអត់ធ្មត់ យុទ្ធសាស្ត្រវែងឆ្ងាយ និងការបត់បែនទៅតាមការប្រែប្រួលនៃសេដ្ឋកិច្ច។ ជោគជ័យពិតប្រាកដនៃអាជីវកម្មកើតចេញពីការបង្កើតតុល្យភាពរវាងការដោះស្រាយបញ្ហាឱ្យអតិថិជន ការប្រើប្រាស់បច្ចេកវិទ្យាឱ្យចំគោលដៅ និងការគ្រប់គ្រងផ្ទៃក្នុងប្រកបដោយតម្លាភាព៕