ប្រាសាទអង្គរវត្ត ​ដែល​ទាក់ទាញ​បំផុត​របស់​កម្ពុជា ​បាន​ជាប់លេខ​រៀង​ទី​៧​ ​ក្នុង​បញ្ជី​នៃ​កន្លែង​ទេសចរណ៍​ដ៏​ពេញ​និយម​បំផុត ​នៅ​លើ​ពិភពលោក ​ដែលបាន​ចេញផ្សាយ​ដោយ​ក្រុមហ៊ុនទេសចរណ៍​ល្បីល្បាញមួយ ឈ្មោះថា ​Titan​ ​Travel​ ​កាលពី​ពេលថ្មីៗកន្លងទៅនេះ​។

​បញ្ជី​នេះ​ត្រូវ​បាន​ចងក្រង​ដោយ​ក្រុមហ៊ុនទេសចរណ៍​អង់គ្លេស​ ​ដោយ​បាន​រាប់​ប​ញ្ជូ​ល​នៃ​ការ​បង្ហោះ​នៅ​លើ​ប្រព័ន្ធ​ផ្សព្វផ្សាយ​សង្គមថា ប្រាសាទអង្គរវត្ត គឺមានភាពស្រស់ស្អាតខ្លាំងជាទីបំផុត​។​ ​ហើយនៅ​ក្នុងករណីនេះ​ ​គេហទំព័រ​ប្រព័ន្ធ​ផ្សព្វផ្សាយ​សង្គម​ដ៏​ពេញ​និយម​ ​T​i​k​To​k ​និង​ ​Inst​a​gram​ ​ត្រូវ​បាន​ប្រើប្រាស់​សម្រាប់​ធ្វើ​ការស្ទង់មតិ​។​

លោក​ ​សុខុម​ ​សំអុល​ ​នាយក​ប្រតិបត្តិ​សមាគម​ក្លឹប​ទេសចរណ៍​ខេត្ត​សៀមរាប ​បានមានប្រសាសន៍កាលពី​ថ្ងៃអង្គារកន្លងទៅ​ថា​ “​ប្រាសាទអង្គរវត្ត​ គឺមិន​ត្រឹមតែ​ជា​សម្បត្តិ​បេតិកភណ្ឌ​ពិភពលោក​របស់​អង្គការ​យូ​ណេស្កូ​ប៉ុណ្ណោះនោះ​ទេ​ ​ប៉ុន្តែ​ ក៏​ជា​និមិត្តរូប​នៃ​បេតិកភណ្ឌ​វប្បធម៌​ដ៏​សម្បូរ​បែប ​របស់​កម្ពុជា​ផង​ដែរ​។​ ​លោក​បាន​បន្ថែម​ទៀតថា​ ​ទិដ្ឋភាព​ថ្ងៃរះ​ ​ព្រមទាំង​ថ្ងៃលិច​ រូប​ចម្លាក់​ដ៏ល្អ​ប្រណិត​ ​រួមទាំង​រចនា​បទ​ដ៏​អស្ចារ្យ​ នោះ​គឺបានផ្តល់​ឱកាសឱ្យ​​អ្នកថតរូប ​ផ្តិត​យក​រូបភាព​ដ៏​ល្អឥតខ្ចោះទាំងនោះ​ ​ទៅ​ទាក់ទាញ​ភ្ញៀវ​ទេសចរ និងធ្វើឱ្យពិភពលោក ស្គាល់ប្រទេសកម្ពុជាកាន់តែច្រើនឡើង។

​លោកស្រី​ ​ឆាយ​ ​ស៊ី​វលី​ន​ ​ប្រធាន​សមាគម​ទីភ្នាក់ងារ​ទេសចរណ៍​កម្ពុជា​ បានមានប្រសាសន៍ថា​ ​សារសំខាន់​នៃ​ប្រវត្តិសាស្ត្រ​ ​និង​វប្បធម៌​កម្ពុជា បាន​ទាក់ទាញ​ភ្ញៀវ​ទេសចរ​នៅ​ទូទាំង​ពិភពលោក​ ​ដែល​នាំ​ឱ្យ​មានការ​ចែករំលែក​ជា​ញឹកញាប់​ នៅ​លើ​វេទិកា​ប្រព័ន្ធ​ផ្សព្វផ្សាយ​សង្គម​។ ជាការពិតណាស់​ ​ប្រាសាទអង្គរវត្ត ​ត្រូវ​បាន​ហ៊ុំ​ព័ទ្ធ​ដោយ​ព្រៃឈើ​ខៀវស្រងាត់​ ​ស្រះ​ទឹក​ ​និង​សំណង់​បុរាណ​ ​ដែលអាច​ផ្តល់​កន្លែង​ថតរូប​ដ៏គួរឱ្យទាក់ទាញជាទីបំផុត​។​ ​

​លោក​ J​ere​m​i​e​ ​Clement​ ​នាយក​គ្រប់គ្រង​ទូទៅ​នៃ​សណ្ឋាគារ​ ​Peninsula​ ​P​h​no​m​ ​P​e​n​h​ ​បានមានប្រសាសន៍ថា​ “​វា​ជា​ការពិត​ដែល​ថា ​ប្រាសាទអង្គរវត្ត ​ស្ថិតនៅ​ក្នុង​ព្រៃ​ដ៏​ខៀវស្រងាត់​ ហើយមានការ​ហ៊ុំ​ព័ទ្ធ​ដោយ​ដើមឈើ​ដែល​មាន​អាយុកាល​រាប់​សតវត្ស​។  បន្ថែមពីលើនោះ គឺមានពពួក​សត្វស្លាប​ ​និង​សត្វ​ស្វា​ជាច្រើន ដោយអាចទាក់ទាញដល់អ្នកទស្សនាជាលើកដំបូងជាខ្លាំង។​

​លោក​ J​e​an​-​Ben​oî​t​ ​Lass​e​l​in​ ​ដៃគូ​គ្រប់គ្រង​នៅ​ C4 ​Adventure​s ​បាន​និយាយ​ថា​ ​សម្រាប់​មនុស្សជា​ច្រើន​ ​ការ​ទៅ​ទស្សនា​ប្រាសាទអង្គរវត្ត ​គឺជា​បទពិសោធន៍​ដ៏​អស្ចារ្យ​ ​ហើយ​ពួកគេ​ចង់​ចែករំលែក​ពេលវេលា​ដ៏​ពិសេស​នេះ​ជាមួយ​អ្នក​ផ្សេងទៀត ​តាម​បណ្តាញ​សង្គម​របស់​ពួកគេ​។​ ​

យ៉ាងណាក៏ដោយ អ្នកទស្សនា​ប្រាសាទអង្គរវត្ត​ មិន​ត្រឹមតែ​បានឃើញ​ស្ថាបត្យកម្ម​ដ៏​អស្ចារ្យ​ប៉ុណ្ណោះនោះ​ទេ​ ​ថែមទាំង​បាន​ដឹង​ដោយជ្រួតជ្រាប​នូវ​វប្បធម៌​ខ្មែរ​ដ៏​សម្បូរ​បែប​ ​ដែល​ពួកគេ​បាន​រំលេច​នៅ​ក្នុង​ការ​បង្ហោះ​នៅ​លើ​បណ្តាញ​សង្គម​របស់​ពួកគេ​។ ពិតមែនហើយ​ ប្រាសាទអង្គរវត្ត គឺជាប្រាសាទបុរាណខ្មែរ ដែលពិភពលោក មិនអាចមើលរំលងបាននោះឡើយ៕