កាលពីថ្ងៃទី១០ ខែកញ្ញា ឆ្នាំ២០២៤ ឯកឧត្តម ហោ សារុន រដ្ឋលេខាធិការក្រសួងទេសចរណ៍ និងតំណាងឯកឧត្តម សុខ សូកេន រដ្ឋមន្ដ្រីក្រសួងទេសចរណ៍ បានអញ្ជើញជាអធិបតីភាព ក្នុងកម្មវិធីបើកសិក្ខាសាលា ស្ដីអំពី    «បដិសណ្ឋារកិច្ចល្អ ទេសចរណ៍មានសុវត្ថិភាព» នៅខេត្ដសៀមរាប។

ថ្លែងក្នុងឱកាសនោះ ឯកឧត្តម ហោ សារុន បានលើកឡើងថា ការធ្វើបដិសណ្ឋារកិច្ចចំពោះភ្ញៀវទេសចរ គឺជាកាតព្វកិច្ចរបស់ប្រជាពលរដ្ឋខ្មែរគ្រប់រូបជាម្ចាស់ផ្ទះ ដែលជាធាតុផ្សំដ៏សំខាន់ នៃភាពទាក់ទាញរបស់កម្ពុជា និងជាការបង្កើតអនុស្សាវីយ៍គួរជាទីចងចាំសម្រាប់ភ្ញៀវទេសចរ។ ឯកឧត្តម ហោ សារុន បានបន្តទៀតថា «ជាការពិតណាស់ ការធ្វើបដិសណ្ឋារកិច្ចចំពោះភ្ញៀវទេសចរ គឺជាកាតព្វកិច្ចរបស់ប្រទេសកម្ពុជា ដែលមិនត្រឹមតែផ្តល់ភាពកក់ក្តៅជូនភ្ញៀវទេសចរប៉ុណ្ណោះទេ ប៉ុន្តែថែមទាំងបានឆ្លុះបញ្ចាំងពីវប្បធម៌ដ៏ល្អផូរផង់ និងប្រពៃណីរបស់ខ្មែរយើងផងដែរ»។

បើតាមការបញ្ជាក់រ​បស់ឯកឧត្តម ហោ សារុន ក្នុងរយៈពេល៧ខែ នាដើមឆ្នាំ២០២៤នេះ កម្ពុជាទទួលបានភ្ញៀវទេសចររហូតដល់ ៣.៣៤ លាននាក់ កើនឡើង ២៣.២% ធៀបនឹងរយៈពេលដូចគ្នា ក្នុងឆ្នាំ២០២៣ និងសម្រេចបាន ៩៧.៨% ធៀបនឹងរយៈពេលដូចគ្នា ក្នុងឆ្នាំ២០១៩ មុនពេលមានវិបត្តិកូវីដ-១៩។

ដោយ : ឃី វុទ្ធី