អត្ថបទព័ត៌មានស្តីពីដំណើរកម្សាន្ត
ក្រោមប្រធានបទ “សហគមន៍ទេសចរណ៍ប្រទេសកម្ពុជា”
អត្ថបទដកស្រង់ដោយ៖ ជុំ ស៊ីធាន់
#MJQE #AmericanInterconSchool
 
វិស័យទេសចរណ៍ផ្អែកលើសហគមន៍ (Community-Based Tourism - CBT) នៅប្រទេសកម្ពុជា កំពុងបង្ហាញពីសក្តានុពលយ៉ាងខ្លាំងក្នុងការទាក់ទាញភ្ញៀវទេសចរជាតិ និងអន្តរជាតិ។ ពោលគឺ ទេសចរណ៍សហគមន៍មានប្រសិទ្ធភាពក្នុងការកាត់បន្ថយភាពក្រីក្រ និងការពារធនធានធម្មជាតិផងដែរ។
 
១. អ្វីទៅជាសហគមន៍ទេសចរណ៍?
សហគមន៍ទេសចរណ៍ គឺជាទម្រង់ទេសចរណ៍មួយដែលគ្រប់គ្រង និងដឹកនាំដោយប្រជាពលរដ្ឋនៅក្នុងមូលដ្ឋានផ្ទាល់។ ប្រាក់ចំណូលដែលទទួលបានពីសេវាកម្មនានាដូចជា៖ ការស្នាក់នៅ (Homestay) ការនាំដើរកម្សាន្ត ម្ហូបអាហារ និងការលក់វត្ថុអនុស្សាវរីយ៍ គឺត្រូវបានបែងចែកទៅក្នុងសហគមន៍ដោយផ្ទាល់ ដើម្បីអភិវឌ្ឍភូមិឃុំ និងលើកកម្ពស់ជីវភាពរស់នៅរបស់ពលរដ្ឋ។
 
២. សហគមន៍ទេសចរណ៍លេចធ្លោនៅកម្ពុជា :
កម្ពុជាមានសហគមន៍ទេសចរណ៍ជាច្រើនដែលកំពុងដំណើរការយ៉ាងជោគជ័យ ដែលក្នុងនោះរួមមាន៖
សហគមន៍ទេសចរណ៍ជីផាត (ខេត្តកោះកុង)៖ ល្បីល្បាញខាងការដើរកម្សាន្តក្នុងព្រៃជ្រៅ ការជិះកង់លើភ្នំ និងការមើលសត្វព្រៃ។
សហគមន៍អេកូទេសចរណ៍សម្រស់កោះហាន (ខេត្តស្ទឹងត្រែង)៖ ផ្តល់បទពិសោធបោះជំរំលើកោះ        កណ្តាលទន្លេមេគង្គ និងទស្សនាព្រៃលិចទឹក។
សហគមន៍ទេសចរណ៍បន្ទាយឆ្មារ (ខេត្តបន្ទាយមានជ័យ)៖ ផ្តោតលើទេសចរណ៍វប្បធម៌ ការទស្សនាប្រាសាទបុរាណ និងការស្វែងយល់ពីជីវភាពរស់នៅតាមជនបទ។
សហគមន៍អេកូទេសចរណ៍ចំបក់ (ខេត្តកំពង់ស្ពឺ)៖ ទីតាំងដ៏សក្តិសមសម្រាប់ការលំហែកាយជាមួយទឹកធ្លាក់ធម្មជាតិ និងការជិះរទេះគោសហគមន៍។
 
៣. ផលប្រយោជន៍សំខាន់ៗ :
ផ្នែកសេដ្ឋកិច្ច៖ បង្កើតការងារធ្វើនៅនឹងកន្លែង កាត់បន្ថយការចំណាកស្រុករបស់ប្រជាពលរដ្ឋទៅក្រៅប្រទេស។
ផ្នែកបរិស្ថាន៖ ប្រែប្រួលពីរបររកស៊ីកាប់ឈើ ឬបរបាញ់សត្វព្រៃខុសច្បាប់ មកជាអ្នកការពារ និងនាំភ្ញៀវទស្សនាធម្មជាតិវិញ។
ផ្នែកវប្បធម៌៖ ជួយថែរក្សាទំនៀមទម្លាប់ ប្រពៃណី និងម្ហូបអាហារតំបន់មិនឱ្យបាត់បង់។

ក្រសួងទេសចរណ៍ រួមជាមួយអង្គការដៃគូ កំពុងបន្តយុទ្ធសាស្ត្រថ្មីៗពង្រឹងសមត្ថភាពបដិសណ្ឋារកិច្ច  ការគ្រប់គ្រងកាកសំណល់ និងការផ្សព្វផ្សាយតាមប្រព័ន្ធឌីជីថល ក្នុងគោលបំណងធ្វើឱ្យសហគមន៍ទេសចរណ៍កម្ពុជា ក្លាយជាគោលដៅទេសចរណ៍បៃតងប្រកបដោយគុណភាព និងនិរន្តរភាព។
ការចូលរួមគាំទ្រដើរកម្សាន្តតាមសហគមន៍ពីសំណាក់បងប្អូនប្រជាពលរដ្ឋផ្ទាល់ គឺជាកម្លាំងចលករយ៉ាងសំខាន់ក្នុងការជំរុញសេដ្ឋកិច្ចផ្ទៃក្នុងឱ្យកាន់តែរឹងមាំ៕