សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា នឹងអញ្ជើញចូលរួមជាអធិបតីដ៏ខ្ពង់ខ្ពស់ ក្នុងពិធីសំណេះសំណាលជាមួយសិស្សនិទ្ទេស A នៃការប្រឡងសញ្ញាបត្រមធ្យមសិក្សាទុតិយភូមិ (បាក់ឌុប) សម័យប្រឡង ឆ្នាំ២០២៥ នៅថ្ងៃទី១០ ខែកុម្ភៈ ឆ្នាំ២០២៦ ខាងមុខនេះ។ ក្នុងឱកាសដ៏មានអត្ថន័យនេះ សិស្សានុសិស្សនៃសាលារៀន អន្តរទ្វីប អាមេរិកាំង (AIS) ដែលទទួលបាននិទ្ទេស A ចំនួន ៩៥ នាក់ ក៏បានត្រៀមលក្ខណៈរួចរាល់ ដើម្បីចូលរួមក្នុងពិធីដ៏មានសារៈសំខាន់នេះផងដែរ។

យោងតាមសេចក្តីជូនដំណឹងរបស់ក្រសួងអប់រំ យុវជន និងកីឡា ដែលបានផ្សព្វផ្សាយកាលពីថ្ងៃទី២២ ខែមករា ឆ្នាំ២០២៦ ស្តីពីការរៀបចំពិធីសំណេះសំណាលជាមួយសិស្សនិទ្ទេស A នៃការប្រឡងសញ្ញាបត្រមធ្យមសិក្សាទុតិយភូមិ និងសិស្សជាប់ការប្រឡងសញ្ញាបត្របច្ចេកទេស និងវិជ្ជាជីវៈ កម្រិត ៣ បានឱ្យដឹងថា ពិធីនេះនឹងប្រព្រឹត្តទៅនៅមជ្ឈមណ្ឌលសន្និបាត និងពិព័រណ៍អន្តរជាតិជ្រោយចង្វារ វេលាម៉ោង ៧:០០ នាទីព្រឹក។

គួរបញ្ជាក់ផងដែរថា កាលពីថ្ងៃទី១៩ ខែកញ្ញា ឆ្នាំ២០២៥ ក្រសួងអប់រំ យុវជន និងកីឡា បានប្រកាសលទ្ធផលថា ការប្រឡងសញ្ញាបត្រមធ្យមសិក្សាទុតិយភូមិ (បាក់ឌុប) ឆ្នាំ២០២៥ មានបេក្ខជនប្រឡងជាប់សរុប ១២២,៤៧៣ នាក់ ស្មើនឹង ៨៤.៥៦ ភាគរយ នៃចំនួនបេក្ខជនដែលបានចូលរួមប្រឡង៕