គណៈគ្រប់គ្រងសាលារៀន អន្តរទ្វីប អាមេរិកាំង (AIS) លោកស្រី រស់ យ៉ាណា បានដឹកនាំក្រុមការងារ រួមដំណើរជាមួយថ្នាក់ដឹកនាំមជ្ឈមណ្ឌលភាសា អេ អាយ អាយ និងក្រុមហ៊ុន SOGO ចូលរួមវេទិកាអប់រំអន្តរជាតិឆ្នាំ២០២៦ ដែលរៀបចំឡើងដោយ Beijing Foreign Studies University (IBS, BFSU) នៅសាធារណរដ្ឋប្រជាមានិតចិន ចាប់ពីថ្ងៃទី២១ ដល់ថ្ងៃទី២៥ ខែមេសា ឆ្នាំ២០២៦។

ការចូលរួមក្នុងវេទិកាអន្តរជាតិនេះ មានគោលបំណងពង្រឹងទំនាក់ទំនងអប់រំ និងបង្កើនកិច្ចសហប្រតិបត្តិការជាមួយស្ថាប័នអប់រំឈានមុខនៅលើឆាកអន្តរជាតិ។ ជាពិសេស គណៈគ្រប់គ្រង ក៏បានបន្តពិភាក្សា និងពង្រឹងការអនុវត្តអនុស្សរណៈយោគយល់គ្នា (MoU) ជាមួយ Beijing Foreign Studies University ដើម្បីបង្កើនឱកាសសិក្សាដល់សិស្សានុសិស្ស។

តាមរយៈកិច្ចសហប្រតិបត្តិការនេះ សិស្សានុសិស្សនៃសាលារៀន អន្តរទ្វីប អាមេរិកាំង នឹងទទួលបាន     ឱកាសកាន់តែទូលំទូលាយ ក្នុងការចូលរួមកម្មវិធីអប់រំអន្តរជាតិ ក៏ដូចជាលទ្ធភាពទទួលបានអាហារូបករណ៍ ទៅបន្តការសិក្សានៅសាកលវិទ្យាល័យល្បីៗ នៃសាធារណរដ្ឋប្រជាមានិតចិន។

សូមបញ្ជាក់ផងដែរថា ការចូលរួមយ៉ាងសកម្មរបស់សាលារៀន អន្តរទ្វីប អាមេរិកាំង (AIS) ក្នុងវេទិកាអប់រំអន្តរជាតិ ឆ្នាំ២០២៦នេះ បង្ហាញពីការប្តេជ្ញាចិត្តក្នុងការលើកកម្ពស់គុណភាពអប់រំ និងបង្កើតឱកាសអភិវឌ្ឍន៍អនាគតសម្រាប់សិស្សានុសិស្សឱ្យសមស្របនឹងស្តង់ដាអន្តរជាតិ៕