សាលារៀន អន្តរទ្វីប អាមេរិកាំង (AIS) បានរៀបចំការប្រកួតចំណេះដឹងភូមិសាស្ត្រជាតិ ម៉េងលី ជេ. គួច លើកទី១២ វគ្គផ្តាច់ព្រ័ត្រ សម្រាប់ឆ្នាំសិក្សា ២០២៥–២០២៦ នៅថ្ងៃទី២៩ ខែឧសភា ឆ្នាំ២០២៦ នៅសាខាជ្រោយចង្វារ ក្រោមវត្តមានលោកស្រី រស់ យ៉ាណា ប្រធាន នៃសាលារៀន អន្តរទ្វីប​ អាមេរិកាំង រួមជាមួយគណៈកម្មការ លោកគ្រូ អ្នកគ្រូ មាតាបិតា អ្នកអាណាព្យាបាល និងសិស្សានុសិស្សយ៉ាងច្រើនកុះករ ក្នុងបរិយាកាសពោរពេញដោយភាពរំភើប និងស្មារតីប្រកួតប្រជែងយ៉ាងសកម្ម។

វគ្គផ្តាច់ព្រ័ត្រនេះ មានសិស្សជាប់ជម្រុះចំនួន ២៦ រូប ដោយចែកជាពីរកម្រិត រួមមាន៖ កម្រិតបឋមភូមិ (ថ្នាក់ទី៧ ដល់ទី៩) មានសំណួរ-ចម្លើយចំនួន ៥៥០ និងកម្រិតទុតិយភូមិ (ថ្នាក់ទី១០ ដល់ទី១២) មានសំណួរ-ចម្លើយចំនួន ៦៧៤។

លោក តាំង វិបុល ចាងហ្វាងរងមធ្យមសិក្សាបឋមភូមិ និងទុតិយភូមិ សាខាចោមចៅ បានឱ្យដឹងថា កម្មវិធីប្រកួតនេះត្រូវបានរៀបចំឡើងជារៀងរាល់ឆ្នាំ ក្នុងគោលបំណងជំរុញសិស្សឱ្យចូលរួមប្រកួតប្រជែងបែបវិជ្ជាជីវៈ បង្កើនគំនិតច្នៃប្រឌិត និងលើកកម្ពស់ចំណេះដឹងលើវិស័យភូមិសាស្ត្រ សេដ្ឋកិច្ច នយោបាយជាតិ និងអន្តរជាតិ ផែនដី និងបរិស្ថានវិទ្យា។

ក្នុងឱកាសនោះ លោកស្រី រស់ យ៉ាណា ប្រធាន នៃសាលារៀន អន្តរទ្វីប​ អាមេរិកាំងបានរំលឹកថា ការប្រកួតចំណេះដឹងភូមិសាស្ត្រជាតិ ម៉េងលី ជេ. គួច (The Mengly J. Quach National Geographic Bee Contest) ត្រូវបានបង្កើតឡើងជាលើកដំបូងនៅថ្ងៃទី២៤ ខែមិថុនា ឆ្នាំ២០១៣ សម្រាប់សិស្សថ្នាក់ទី៧ ដល់ទី១២។ កម្មវិធីនេះទទួលបានប្រជាប្រិយភាពយ៉ាងខ្លាំង ហើយមានដើមកំណើតពីសហរដ្ឋអាមេរិក ដែលបានចាប់ផ្តើមនៅឆ្នាំ១៩៨៩ នៅទូទាំងរដ្ឋទាំង៥០។

លោកស្រីបានបន្ថែមថា ការប្រកួតនេះជួយជំរុញឱ្យសិស្សខិតខំរៀនសូត្រ បង្កើនសមត្ថភាពលើមុខវិជ្ជាភូមិវិទ្យា និងផែនដីវិទ្យា ព្រមទាំងពង្រីកចំណេះដឹងអំពីភូមិសាស្ត្រជាតិឱ្យកាន់តែទូលំទូលាយ។ លើសពីនេះ វាក៏ជួយលើកស្ទួយការយល់ដឹងអំពីសក្ដានុពលទេសចរណ៍ វប្បធម៌ និងធនធានធម្មជាតិរបស់កម្ពុជា ដែលជាផ្នែកមួយសំខាន់ក្នុងការអភិវឌ្ឍសេដ្ឋកិច្ចជាតិ និងលើកកម្ពស់មោទនភាពជាតិផងដែរ។ លោកស្រីបន្តថា ដោយ​ឃើញ​អំពី​អត្ថប្រយោជន៍​ជា​ច្រើន អ្នកឧកញ៉ា វេជ្ជបណ្ឌិត  គួច ម៉េងលី ​នាំ​​យក​នូវ​កម្មវិធី​នេះ​ពី​បស្ចិម​ប្រទេស​​ចូល​​មក​ប្រទេស​​កម្ពុជា​​​យើង​ដំបូង​​​គេបង្អស់ ​មក​ប្រារព្ធ​នៅ​សាលារៀន អន្ដរទ្វីប អាមេរិកាំង​។ លោកស្រីបានគូសបញ្ជាក់ថា កម្មវិធីនេះ មិនត្រឹមតែស្វែងរកសិស្សពូកែប៉ុណ្ណោះទេ ប៉ុន្តែជាការបណ្តុះយុវជនឱ្យមានចំណេះដឹងទូលំទូលាយ សមត្ថភាពប្រកួតប្រជែង និងទំនួលខុសត្រូវចំពោះសង្គម និងប្រទេសជាតិ។

បន្ទាប់ពីការប្រកួតដ៏ស្វិតស្វាញ គណៈកម្មការបានរកឃើញសិស្សជ័យលាភី៖

លេខ១ យុវសិស្ស  ចៅ កុកជីន ថ្នាក់ទី៨A  សាខាទួលគោក ទទួលបានមេដាយមាស ១ ពានរង្វាន់ អាហារូបករណ៍សិក្សា ១០០ភាគរយ បណ្ណសរសើរ និងវត្ថុអនុស្សាវរីយ៍។
លេខ២ យុវតី ចៅ លីភីង ថ្នាក់ទី១០ A សាខាសៀមរាប  ទទួលបានមេដាយប្រាក់ ១ អាហារូបករណ៍សិក្សា ៧៥ភាគរយ បណ្ណសរសើរ និងវត្ថុអនុស្សាវរីយ៍
លេខ៣ យុវសិស្ស ឆិ គីមឡុង ថ្នាក់ទី១០ B សាខាទួលគោកទទួលបានមេដាយសំរឹទ្ធ ១ អាហារូបករណ៍សិក្សា ៥០ភាគរយ បណ្ណសរសើរ និងវត្ថុអនុស្សាវរីយ៍

សូមបញ្ជាក់ថា អាហារូបករណ៍ទាំងនេះ ត្រូវបានផ្តល់ជូនជាពិសេសសម្រាប់សិស្សជ័យលាភី ដែលបន្តការសិក្សានៅសាលារៀន អន្តរទ្វីប អាមេរិកាំង (AIS) ក្នុងឆ្នាំសិក្សាបន្ទាប់៕