ឆ្នាំសិក្សាថ្មីកាន់តែរំកិលខ្លួនខិតចូលមកជិតដល់ហើយ ពេលនេះបរិយាកាសនៅតាមសាលារៀនអន្តរទ្វីបអាមេរិកាំង (AIS) ក៏ចាប់ផើ្តមមានភាពអ៊ូអរ និងរីករាយជាបណ្ដើរផងដែរ។ សម្រាប់សិស្សានុសិស្ស ឆ្នាំថ្មីអាចនាំមកនូវថ្នាក់ថ្មី មេរៀនថ្មី គ្រូថ្មី និងគោលដៅថ្មីៗ។ ប៉ុន្តែឆ្នាំសិក្សាថ្មី មិនមែនមានន័យថា សិស្សត្រូវចាប់ផ្តើមគ្រប់យ៉ាងពីសូន្យនោះទេ។

អ្វីដែលសិស្សបានរៀនកាលពីឆ្នាំមុន ទាំងចំណេះដឹង បទពិសោធ កំហុស និងភាពជោគជ័យ សុទ្ធតែជាមូលដ្ឋានសម្រាប់ការរីកចម្រើនបន្តនៅឆ្នាំសិក្សាថ្មី។ មេរៀនមួយដែលធ្លាប់ពិបាក កិច្ចការមួយដែលធ្លាប់ធ្វើមិនបានល្អ ឬសមិទ្ធផលតូចមួយដែលធ្លាប់សម្រេចបាន គ្រប់យ៉ាងសុទ្ធតែជាផ្នែកមួយនៃដំណើរសិក្សារបស់សិស្ស។

ឆ្នាំថ្មី ដូច្នេះ មិនមែនជាពេលសម្រាប់បំភ្លេចអ្វីដែលបានកន្លងផុតទេ ប៉ុន្តែជាឱកាសសម្រាប់មើលត្រឡប់ទៅអ្វីដែលខ្លួនបានរៀន ហើយសួរខ្លួនឯងថា «តើខ្ញុំអាចធ្វើអ្វីឱ្យបានប្រសើរជាងមុន?»
សិស្សម្នាក់អាចចង់កែលម្អលទ្ធផលសិក្សា ម្នាក់ទៀតចង់ហ៊ានសួរសំណួរនៅក្នុងថ្នាក់ ឬចង់ចូលរួមសកម្មភាពសាលាឱ្យបានច្រើនជាងមុន។ ទាំងនេះមិនចាំបាច់ត្រូវជាគោលដៅធំៗនោះទេ។ ការរីកចម្រើនពិតប្រាកដ អាចចាប់ផ្តើមពីការផ្លាស់ប្តូរតូចៗដែលអនុវត្តជាប្រចាំ។

អ្វីដែលសំខាន់ជាងនេះ គឺសិស្សមិនគួរយកខ្លួនឯងទៅប្រៀបធៀបជាមួយអ្នកដទៃនៅពេលចាប់ផ្តើមឆ្នាំថ្មី។ ម្នាក់ៗមានល្បឿនរៀន បទពិសោធ និងចំណុចខ្លាំងខុសៗគ្នា។ អ្វីដែលគួរធ្វើ គឺប្រៀបធៀបខ្លួនឯងនៅថ្ងៃនេះ ជាមួយខ្លួនឯងកាលពីម្សិលមិញ ហើយស្វែងរកវិធីធ្វើឱ្យខ្លួនឯងកាន់តែប្រសើរឡើង។
នៅពេលសិស្សចូលថ្នាក់រៀននៅថ្ងៃដំបូងនៃឆ្នាំសិក្សាថ្មី ពួកគេមិនមែនចូលទៅជាមួយសៀវភៅទទេមួយក្បាលនោះទេ។ ពួកគេចូលទៅជាមួយចំណេះដឹង បទពិសោធ មេរៀនជីវិត និងក្តីស្រមៃដែលបានប្រមូលផ្តុំតាមរយៈដំណើរសិក្សាកន្លងមក។

ដូច្នេះ ឆ្នាំសិក្សាថ្មីមិនមែនជាការចាប់ផ្តើមពីសូន្យទេ។ វាគឺជា ទំព័រថ្មីមួយ ដែលសរសេរបន្តពីរឿងរ៉ាវដែលបានចាប់ផ្តើមរួចហើយ។ អ្វីដែលសិស្សបានរៀនកាលពីម្សិលមិញ នឹងក្លាយជាកម្លាំងសម្រាប់ការរីកចម្រើននៅថ្ងៃស្អែក។
នៅពេលទ្វារសាលាបើកឡើងវិញ សូមឱ្យសិស្សានុសិស្សចូលទៅក្នុងឆ្នាំសិក្សាថ្មីដោយមិនត្រឹមតែមានសៀវភៅ និងសម្ភារសិក្សារួចរាល់ប៉ុណ្ណោះទេ ប៉ុន្តែមាន ទំនុកចិត្ត គោលដៅ និងបំណងចង់ក្លាយជាខ្លួនឯងដែលប្រសើរជាងមុន។
ព្រោះការចាប់ផ្តើមឆ្នាំសិក្សាថ្មី មិនមែនមានន័យថាចាប់ផ្តើមពីសូន្យទេ ប៉ុន្តែជាការបន្តដំណើរទៅមុខ ជាមួយអ្វីៗដែលយើងបានរៀនពីម្សិលមិញ៕