គោលដៅនៃការសិក្សា មិនមែនត្រឹមតែមានចំណេះ ពោលគឺយុវជនចាំបាច់ត្រូវតែមានបំណិន និងសហគ្រិនភាពបន្ថែមទៀត

បានផ្សាយចេញ | ១២ វិច្ឆិកា ២០២៤

គោលដៅនៃការសិក្សា មិនមែនត្រឹមតែមានចំណេះ ពោលគឺយុវជនចាំបាច់ត្រូវតែមានបំណិន និងសហគ្រិនភាពបន្ថែមទៀត

នៅក្នុងគោលដៅនៃការ​សិក្សា គឺមិនមែន​ត្រឹម​តែ​ឱ្យ​យុវជន​មាននូវចំណេះដឹងប៉ុណ្ណោះនោះទេ ប៉ុន្តែយុវជនទាំងនោះ ​ចាំបាច់ត្រូវ​តែមាន​បំណិន និងសហគ្រិនភាពបន្ថែមទៀត ដើម្បី​អាច​ចេះគិត ចេះពិចារណា ចេះដោះស្រាយ​បញ្ហា និងមានភាពជាអ្នកដឹកនាំ​ ក្នុងការស់នៅក្នុងសង្គមជាតិ។

ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្រ្តី រដ្ឋមន្រ្តីក្រសួងអប់រំ យុវជន និងកីឡា មានប្រសាសន៍ថា ការសិក្សា​រៀនសូត្រ គឺមិនមែនត្រឹម​តែការមានចំណេះដឹងក្នុងថ្នាក់តែម្យ៉ាងប៉ុណ្ណោះនោះទេ ប៉ុន្តែត្រូវ​មានបំណិនជីវិត និងជំនាញគ្រប់គ្រាន់។

ឯកឧត្តម​បញ្ជាក់ថា គោលដៅ​នៃការសិក្សា គឺត្រូវ​មាន​ចំណេះដឹង វិជ្ជាសម្បទា បំណិន​សម្បទារ ដែលមានដូចជា បំណិនទន់ បំណិនវិជ្ជាជីវៈ ឬចរិយាសម្បទា ដោយសរុបជារួម យើងហៅថា បំណិនសតវត្សទី២១ ដើម្បី​យុវជន​មានទាំងចំណេះដឹង ចេះគិតពិចារណា ដើម្បីដោះស្រាយ​បញ្ហានានា ហើយមានភាពជាអ្នកដឹកនាំ និងចេះខាងបច្ចេកវិទ្យាឌីជីថលផងដែរ។

បើតាមប្រសាសន៍របស់ឯកឧត្តម ពាក់ព័ន្ធជាមួយនឹងបំណិន គឺទាមទារ​ឱ្យ​មាន​ការ​អនុវត្ត ដោយ​នៅ​ក្នុង​កម្មវិធីសិក្សា​របស់ក្រសួងអប់រំសម្រាប់មធ្យមសិក្សា គឺចែកចេញជា​មធ្យមសិក្សា​ចំណេះទូទៅ និង​អប់រំ​បច្ចេកទេស ដោយ​មានដូចជា បំណិន​ក្នុងការ​ចិញ្ចឹម​សត្វ ដាំបន្លែ ហើយ​បំណិន​វិជ្ជាជីវៈ មានដូចជា ការកែច្នៃ​ម្ហូបអាហារ ឬ​ជួសជុល​ម៉ាស៊ីនជាដើម, ចំណែក​បំណិន​នៅក្នុង​កម្រិតក្រោយ​មធ្យមសិក្សា ក្រសួងបានរៀបចំនៅវិទ្យាស្ថានបច្ចេកវិទ្យាកម្ពុជា ដោយ​មាន​៥មុខជំនាញធំៗ។

ពាក់ព័ន្ធនឹង​សហគ្រិនភាពវិញ នៅ​ក្នុងកម្មវិធីសិក្សា ក្រសួងតែងរៀបចំ​ជា​វេទិកាតស៊ូមតិ ឬក៏​លើក​ជាគម្រោង​ណាមួយ ដែល​ជា​ការ​បង្រៀនសិស្ស​ឱ្យ​ចេះគិត ដើម្បីដោះស្រាយបញ្ហានានា ក៏ដូចជា​ការ​ប្រើប្រាស់នូវ​ចំណេះដឹង​ ដើម្បី​ចូលរួម​ចំណែក​នៅ​ក្នុងការ​ដោះស្រាយ​បញ្ហាក្នុងសង្គមជាដើម ។ តាមប្រសាសន៍របស់ ឯកឧត្តមរដ្ឋមន្រ្តីក្រសួងអប់រំ យុវជន និងកីឡា កន្លងមក ក្រសួងធ្លាប់​ដាក់​ឱ្យ​មានការប្រឡងប្រណាំងជាគំនិត រៀបចំជាគំនិត​ ដើម្បី​ដោះស្រាយ​រកទីផ្សារ​សម្រាប់​កសិផល​របស់កសិករជាដើម ។ ហើយ​នៅពេល​បានគំនិតហើយ គឺត្រូវប្រឡងជ្រើសរើសថា គំនិតណាដែល​ល្អជាងគេ ទើបចូល​ដល់ដំណាក់កាល​រៀបចំ​ចាត់ចែង​បង្កើតជា​ក្រុមហ៊ុនជាក់ស្តែង។

ជារួមត្រឡប់មកវិញ បើតាម​ប្រសាសន៍របស់ ឯកឧត្តមបណ្ឌិតសភាចារ្យ ហង់ជួន ណារ៉ុន ប្រសិនបើរៀន​គ្រាន់តែដឹង ហើយមិនចេះធ្វើ ឬមិនអនុវត្តក្នុងការធ្វើ ច្បាស់លាស់ គឺសិស្សានុសិស្សមិនចេះសអ្វីនោះទេ ហើយ​ការ​រៀន​ដែលធ្វើ​ឱ្យ​យើងចេះបំផុតនោះ គឺ​ការ​រៀន​ដោយ​ខ្លួនឯង។