អត្ថបទព័ត៌មានស្តីពីសុខភាព
ក្រោមប្រធានបទ “គន្លឹះសំខាន់ៗដើម្បីសង្គ្រោះសុខភាពពីការអង្គុយធ្វើការយូរពេក”
អត្ថបទដកស្រង់ដោយ : អ៊ុំ ចាន់ដេត
#MJQE#AmericanInterconSchool

នៅក្នុងយុគសម័យឌីជីថលនេះ បុគ្គលិកការិយាល័យភាគច្រើនត្រូវចំណាយពេលយ៉ាងហោចណាស់ពី ៧ ទៅ ៨ម៉ោងក្នុងមួយថ្ងៃ អង្គុយនៅមុខអេក្រង់កុំព្យូទ័រ។ ការសិក្សាផ្នែកវេជ្ជសាស្ត្របានព្រមានថា ការអង្គុយយូរពេកដោយគ្មានចលនា ឬហៅថា "Silent Sit" គឺជាសត្រូវលាក់មុខដែលបំផ្លាញសុខភាពបន្តិចម្តងៗ។ អ្នកជំនាញផ្នែកឆ្អឹង និងសន្លាក់បង្ហាញថា បុគ្គលិកការិយាល័យតែងជួបប្រទះរោគសញ្ញាដំបូងដូចជា ស្ពឹកកញ្ចឹងក ឈឺចង្កេះរ៉ាំរ៉ៃ ភ្នែកស្ងួត និងណែនទ្រូង ដែលឈានទៅរកជំងឺការិយាល័យ ជំងឺសរសៃឈាមបេះដូង និងការកកកុញជាតិខ្លាញ់ក្បាលពោះជាដើម។ ខាងក្រោមនេះ ជាគន្លឹះងាយៗ ដែលអ្នកធ្វើការការិយាល័យគ្រប់រូបគួរអនុវត្តដើម្បីការពាររាងកាយ និងបង្កើនថាមពលខួរក្បាលក្នុងការធ្វើការ៖

១.    អនុវត្តច្បាប់ “៣០-២”:
ការស្រាវជ្រាវបានបង្ហាញថា ការអង្គុយជាប់គ្នារយៈពេលលើសពី ៣០នាទី ធ្វើឱ្យប្រព័ន្ធរំលាយអាហារ និងលំហូរឈាមចាប់ផ្តើមយឺតយ៉ាវ ដែលបង្កើនហានិភ័យនៃជំងឺដាច់សរសៃឈាមខួរក្បាល។ រាល់ការអង្គុយធ្វើការបាន ៣០នាទី ត្រូវដាស់តឿនខ្លួនឯងឱ្យក្រោកឈរ ឬធ្វើចលនារាងកាយរយៈពេល ២នាទីដូចជា ការដើរទៅដាក់ទឹក ដើរទៅបោះសំរាម ឬគ្រាន់តែឈរពត់ខ្លួននៅនឹងកន្លែងជាដើម។

២.    រៀបចំឥរិយាបថអង្គុយ និងកែវភ្នែកឱ្យបានត្រឹមត្រូវ :
ការអង្គុយខុសទម្រង់ គឺជាមូលហេតុចម្បងនៃជំងឺឈឺក ស្មា និងចង្កេះ ឯការសម្លឹងអេក្រង់យូរពេកធ្វើឱ្យខូចគំហើញ។ អ្នកមិនត្រូវអង្គុយខ្វែងជើង ឬគងទាក់ខ្លាឡើយ ដើម្បីការពារការវៀចឆ្អឹងកងខ្នង។ ម្យ៉ាងវិញទៀត អ្នកគួរដាក់អេក្រង់កុំព្យូទ័រឱ្យស្ថិតក្នុងកម្រិតខ្សែភ្នែកល្មម និងមានចម្ងាយប្រហែល ៥០ សង់ទីម៉ែត្រពីភ្នែក ដើម្បីកុំឱ្យឱនកខ្លាំងពេក។ រាល់ ២០នាទីម្តង ចូរសម្រាកភ្នែកដោយសម្លឹងមើលទៅទីឆ្ងាយចម្ងាយ ២០ហ្វូត (៦ម៉ែត្រ) ដើម្បីកាត់បន្ថយការហត់នឿយភ្នែក។

៣.    ញ៉ាំទឹកឱ្យបានច្រើន និងជ្រើសរើសអាហារសម្រន់សុខភាព :
ការដាក់ដបទឹកធំមួយនៅលើតុធ្វើការ គឺជាជម្រើសដ៏ល្អមួយដែលជួយអ្នកឱ្យញ៉ាំទឹកបានច្រើន។ ការញ៉ាំទឹកញឹកញាប់ មិនត្រឹមតែល្អសម្រាប់សុខភាពស្បែក និងការរំលាយអាហារនោះទេ ប៉ុន្តែវាក៏បង្ខំឱ្យអ្នកត្រូវក្រោកដើរទៅបន្ទប់ទឹកជារឿយៗផងដែរ។ ចូរចៀសវាងអាហារសម្រន់ផ្អែមៗ ឬកែច្នៃហួសកម្រិត ដោយប្តូរមកញ៉ាំគ្រាប់ធញ្ញជាតិ ឬផ្លែឈើស្រស់ជំនួសវិញ ដើម្បីរក្សាថាមពលខួរក្បាលឱ្យថេរ និងមិនឡើងគីឡូ។

៤.    លំហាត់ប្រាណខ្នាតតូចនៅលើតុធ្វើការ :
នៅក្នុងអំឡុងពេលរង់ចាំទាញយកឯកសារ ឬសម្រាកពីការងារ អ្នកអាចលើកជើងទាំងពីរឱ្យត្រង់ស្របនឹងកម្រាល រួចទប់ទុករយៈពេល ១០វិនាទី ដើម្បីជួយសាច់ដុំភ្លៅ និងសម្រួលសន្លាក់ជង្គង់។ លើសពីនេះ អ្នកអាចធ្វើចលនាបង្វិលស្មាទៅមុខ និងទៅក្រោយយឺតៗ រួចផ្អៀងកទៅឆ្វេងស្តាំ ដើម្បីកាត់បន្ថយការតានតឹងសាច់ដុំក និងស្មា ដែលជាប្រភពនៃជំងឺឈឺក្បាលប្រកាំង។ ចូរចាំថា សុខភាពល្អចាប់ផ្តើមពីការផ្លាស់ប្តូរទម្លាប់តូចៗ។ ការយកចិត្តទុកដាក់លើរាងកាយដោយគ្រាន់តែក្រោកឈរ សម្រាកភ្នែក និងធ្វើចលនាឱ្យបានញឹកញាប់ មិនត្រឹមតែជួយការពារអ្នកពីជំងឺការិយាល័យដ៏គ្រោះថ្នាក់នោះទេ ប៉ុន្តែវាក៏ជួយបង្កើនប្រសិទ្ធភាពការងារ និងធ្វើឱ្យអ្នកមានថាមពលស្រស់ស្រាយពេញមួយថ្ងៃផងដែរ៕