កីឡាករបាល់ទាត់ Rodri ជាខ្សែបម្រើដ៏មានសក្ដានុពលបំផុតនាពេលបច្ចុប្បន្ន និងជាម្ចាស់ពានរង្វាន់ Ballon D'Or ឆ្នាំ២០២៤ ថែមទាំងជាខ្សែបម្រើឆ្នើម នៅក្នុងក្រុម Manchester City ។
ក្នុងកំឡុងពេលនេះ ខ្សែបម្រើដែលត្រូវបានគេចាត់ទុកថាល្អបំផុត ក្នុងលោកម្នាក់នេះ បានរងរបួសដាច់ជង្គង់ ហើយកំពុងតែសម្រាកព្យាបាល នឹងត្រូវបានគេរំពឹងថា រហូតដល់ដាច់រដូវកាលនេះ ឈានចូលរដូវកាលថ្មី នោះទើបអាចចូលហាត់វិញបាន។
យ៉ាងណាក៏ដោយ ដ្បិតតែមិនទាន់អាចមានវត្តមានក្នុងទីលានប្រកួតវិញបាន Rodri ក៏នៅតែជាមនុស្សដ៏សំខាន់ម្នាក់ ដែលត្រូវបានគេចោទសួរជាប្រចាំ។ ជាក់ស្ដែងថ្មីៗនេះ លោកត្រូវបានសារព័ត៌មានសួរពីចំណុចពិសេសរបស់ Ronaldo និង Messi តើពួកគាត់ល្អបែបណា បើតាមទស្សនៈរបស់Rodri? ហើយការមើលឃើញនេះ គឺនិយាយក្នុងកំឡុងពេលដែលអ្នកទាំងពីរ កំពុងតែពេញល្អដូចគ្នា។
ជុំវិញការចោទជាសំនួរនេះ Rodri បានឆ្លើយតបថា សម្រាប់ខ្ញុំ Ronaldo គឺជាស្តេចពិឃាតដ៏កាចសាហាវ នៅក្នុងប្រអប់ជើង យើងមិនចង់ឱ្យគាត់មានបាល់ក្នុងពេលដែលគាត់កំពុងតែស្ថិតនៅក្នុងការគ្រប់គ្រងបាល់នោះទេ ព្រោះថា គាត់គឺជាអ្នកទាត់បាល់បញ្ចូលទីដ៏អស្ចារ្យម្នាក់។
ចំណែក Messi វិញ គាត់គឺជាមុខសញ្ញាដ៏គ្រោះថ្នាក់បំផុត នៅពេលដែលគាត់មានបាល់នៅក្នុងការគ្រប់គ្រងដោយជើងទាំងពីរបស់គាត់។ ហើយបើនិយាយជារួមវិញ មិនថានៅកន្លែងណានោះទេ ឱ្យតែគាត់បានគ្រប់គ្រងបាល់ នោះគឺជាគ្រោះថ្នាក់ដ៏ធំ សម្រាប់ដៃគូប្រកួតរបស់គាត់៕
