កាលពីថ្ងៃអង្គារ ទី១៨ ខែកុម្ភៈ ឆ្នាំ២០២៥ គណៈកម្មការ នៃសាលារៀន អន្តរទ្វីប អាមេរិកាំង សាខាច្បារអំពៅ បានរៀបចំកម្មវិធីសិក្ខាសាលា ស្តីពី “បារីអេឡិចត្រូនិក” សម្រាប់សិស្សានុសិស្ស ថ្នាក់ទី៧ រហូតដល់ថ្នាក់ទី១២។

គោលបំណងនៃការរៀបចំកម្មវិធីសិក្ខាសាលានេះ គឺដើម្បីទប់ស្កាត់ការប្រើប្រាស់គ្រឿងដែលមានសារធាតុញៀន ហើយជាពិសេសនោះ គឺបារីអេឡិចត្រូនិក។

តាមអង្គនៃកម្មវិធីសិក្ខាសាលា បានបង្ហាញថា សិស្សានុសិស្ស ចាំបាច់ត្រូវស្វែងយល់អំពីផលពិបាក និងគុណវិប្បត្តិ នៃការប្រើប្រាស់គ្រឿងញៀន និងបារីអេឡិចត្រូនិក ឱ្យបានទូលំទូលាយ ដើម្បីជាប្រយោជន៍ ក្នុងការជៀសចេញឱ្យបានជាយ៉ាងដាច់ខាត។

ក្រៅពីនោះ សិស្សានុសិស្ស ត្រូវយល់ដឹងអំពីប្រភេទថ្នាំផ្សេងៗ ដែលអាចមានឥទ្ធិពលទៅដល់រាងកាយ និងផ្លូវចិត្ត ហើយជាទីបំផុត ក៏អាចឈានទៅដល់ការប៉ះពាល់ទៅលើការសិក្សាថែមទៀត។

យ៉ាងណាក៏ដោយ ក្នុងកម្មវិធីសិក្ខាសាលា ក៏មានការបង្ហាញអំពីរបៀបទប់ស្កាត់ និងការជៀសចេញអំពីគ្រឿងញៀន និងការប្រើប្រាស់បារីអេឡិចត្រូនិកផងដែរ ដោយរួមទាំងការលើកទឹកចិត្តឱ្យសិស្សានុសិស្ស ស្រឡាញ់ការសិក្សា និងការមានជីវិតដ៏ស្រស់បំព្រង ដោយការជៀសផុតអំពីគ្រឿងញៀន និងបារីអេឡិចត្រូនិក។